देशीविदेशी शक्तिका कारण पार्टीको पराजय : उपप्रम थापा

0

विराटनगर, १४ माघ (रासस) : उपप्रधानमन्त्री एवं राप्रपाका अध्यक्ष कमल थापाले कार्यकर्तामा हौसला प्रदान गर्न जिल्ला भ्रमण शुरु गरेको बताउनुभएको छ । राप्रपा मोरङका अगुवा कार्यकर्तालाई आज विराटनगरमा सम्बोधन गर्दै उहाँले निर्वाचनको परिणामका कारण कार्यकर्तामा देखिएका अन्योलता र अनिश्चिततालाई हटाउनका लागि आपूmले फागुन महिनासम्ममा अधिकांश जिल्लाको भ्रमण सम्पन्न गर्ने जानकारी गराउनुभयो ।

राष्ट्रवादी शक्ति बलियो नहोस् भन्ने चाहना राखेर देशी विदेशी शक्तिले पार्टी विभाजन गराएको प्रसंग उल्लेख गर्दै राप्रपाका अध्यक्ष थापाले निर्वाचनमा पराजयको मुख्य कारणमा निर्वाचनको पूर्वसन्ध्यामा पार्टी विभाजन, संविधान संशोधनमा अस्थिर नीति र नेपाली काँग्रेससँग सहकार्य गर्नु रहेको उल्लेख गर्नुभयो । धर्म निरपेक्षताको आडमा धर्म परिवर्तन गराउने, राजालाई पाखा लगाउने र अन्ततोगत्वा मुुलुकको विखण्डनको प्रयास देखिएपछि राप्रपाको स्थापना भएको प्रसंग उल्लेख गर्दै उहाँले युवालाई धर्म संस्कृतिको विषयमा जागरुक गराउनुपर्ने आवश्यकता औँल्याउनुभयो ।

उहाँले ९४ प्रतिशत सनातन धर्मावलम्बी भएको मुलुकमा हिन्दूवादी पार्टीका रुपमा रहेको राप्रपाको गत निर्वाचनमा तीन प्रतिशत पनि मत नपाउनु गम्भीर विषय भएको बताउनुभयो । उहाँले जनताले हाम्रो एजेण्डालाई अस्वीकार गरेको होइन भन्दै उहाँले हिन्दू राष्ट्र बनाउने कि नबनाउने विषयमा जनमत संग्रह भयो भने हिन्दू राष्ट्र बनाउने पक्षमा ८० प्रतिशत जनताले मत दिने विश्वास व्यक्त गर्नुभयो ।

पार्टीलाई पुनः निर्णायक शक्तिका रुपमा स्थापित गर्ने वचनबद्धता प्रकट गर्दै उहाँले कार्यकर्तालाई विचलित नभई पार्टी संगठनलाई बलियो बनाउनतर्फ केन्द्रित हुन आह्वान गर्नुभयो । उहाँले फागुन महिनामा पार्टीको केन्द्रीय परिषद्को बैठक वीरगञ्जमा हुने जानकारी गराउँदै पार्टीले आफ्ना मागलाई पूरा गराउनका लागि सडक संघर्ष गर्ने बताउनुभयो ।

सो पार्टीका जिल्ला अध्यक्ष माधव आचार्यको अध्यक्षतामा भएको उक्त कार्यक्रममा पार्टीका केन्द्रीय सदस्यद्वय केदार कोइराला, अम्बिका भण्डारी, केन्द्रीय सदस्य तथा तराई विभागका महासचिव दिनेश साह र प्रदेश नं १ का प्रदेशसभा सदस्य इन्दिरा राईले पार्टीको संगठनलाई बलियो बनाउने लगायतका विषयमा आआफ्ना धारणा प्रकट गर्नुभएको थियो ।

Share.

Comments are closed.

error: Content is protected !!