चूडामणि शर्मा सम्पर्कविहीन, जहाँ भेट्यो त्यहीँ पक्राउ गर्न पक्राउ पुर्जी जारी

0

काठमाडौं, १२ माघ: अकूत सम्पत्ति जोडेको अभियोगमा अख्तियार दुरुपयोग अनुसन्धान आयोगको छानबिनमा रहेका आन्तरिक राजस्व विभागका निलम्बित महानिर्देशक चूडामणि शर्मा सम्पर्कविहीन भएका छन् । अनुसन्धान अन्तिम चरणमा पुग्न लाग्दा शर्मा सम्पर्कमा नरहेकाका हुन् । शर्माले तीन पटक अख्तियारमा बयान दिएका थिए । उनी ‘फरार’ भएको बुझिएको छ ।

अख्तियारले शर्माका नाममा पक्राउ पुर्जी जारी गरेको छ । उनी फेला परेका छैनन् । ‘अनुसन्धान अन्तिम चरणमा पुगेको छ,’ अख्तियार स्रोतले भन्यो, ‘अब उहाँलाई जहाँ भेट्यो त्यहीँबाट समाउँछ ।’ अख्तियारले शर्मामाथिको अनुसन्धानको फाइल आयुक्तहरूलाई बुझाउने तयारी गरेको छ । अब आयुक्तहरूको निर्णयपछि शर्मामाथि अर्को मुद्दा विशेष अदालतमा दायर हुनेछ ।

कर फछ्र्यौट आयोगको मुद्दामा विशेष अदालतबाट एक करोड धरौटीमा छुटेका शर्मालाई अख्तियारले अकुत सम्पत्तिको अनुसन्धानमा तानेको थियो । बयानकै क्रममा उनले आफू बिरामी परेकाले बयानका लागि आउन नसक्ने निवेदन अख्तियारमा पेश गरेका थिए । अख्तियारले पटक–पटक बयानमा बोलाउँदा पनि शर्मा अख्तियार नगएको स्रोतले बतायो ।

कर फछ्र्यौट आयोगको अनियमिततामाथि अनुसन्धान भइरहेका बेला शर्मालाई अख्तियारले १३ पन्ने सम्पत्ति विवरण फारम भराएको थियो । त्यसपछि उनीमाथि अकुत सम्पत्तिको अनुसन्धान पनि अघि बढाइएको छ । सो विवरणमा शर्माले २३ करोडको सम्पत्ति आफूसँग भएको बताएका थिए ।

शर्मा कर फछ्र्यौट आयोगमार्फत कर छुट दिएर भ्रष्टाचार गरेको सबैभन्दा ठूलो मुद्दामा मुछिए । यही अनुसन्धानमा शर्मालाई अख्तियारले अकुत सम्पत्ति आर्जनमा पनि तानेको छ । तत्कालीन अर्थमन्त्री डा. रामशरण महतले कर फछ्र्यौट आयोग गठन गरेका थिए । शर्मामाथि एनसेलको स्वामित्व बिक्री गर्दा राज्यलाई आउनुपर्ने लाभकर छुट दिन भूमिका खेलेको आरोप पनि अख्तियारले लगाएको छ ।

अख्तियारले कर फछ्र्यौट आयोगका अध्यक्ष लुम्बध्वज महत र सदस्य उमेशप्रसाद ढकाललाइ पनि विपक्षी बनाएको थियो । अख्तियार दुरुपयोग अनुसन्धान आयोग ऐन २०४८ को दफा १६ र नियमावली २०५९ को दफा १५ बमोजिम शर्मालाई पक्राउ गरेर अनुसन्धान गर्ने तयारी भएको छ ।

Share.

Comments are closed.

error: Content is protected !!